Ah ! comm’ Nadaud y-avot raijon
In parlant si ben de s’majon !
Et si y-ervernerot sur terre,
C’vi comarat’, c’bon confrère,
Y jubil’rot, y trot hureux
De vire l’majon du Broutteux.

Y-a des momints, qu’in d’vin d’mi’même
Je m’demand’ si j’n’ai po rêvé,
Quo qu’j’ai fait à tertous et s’femme
Pour ête, essin, l’petit Bradé ?
D’tous les côtés in attind dire :
" Et mi aussi, j’m’in vas souscrire".

D’pus l’ovri jusqu’au richard
Tout in chaquin veut mette s’part.
In veut tertous rapporter s’brique

Pou faire l’majon du Broutteux.
In veut qu’ill sot belle et unique !
Quo qu’vous in dit ? Cha ch’est des jeux !
In finit l’souscription par in beau jour de fête :
Cavalcate et ballons, solé qui fait risette.
Pus in afant d’Tourco, ah ! sti là ch’est in hard,
In célèbre architeq’ nommé Monsi Maillard
S’offet de tirer l’plan et de l’donner gratisse,
Et y l’a fait, savez, in véritable artisse :
Sus l’façate in vot les sujets
Du Broutteux les plus beaux succès ;
Vous veyi : Petit Clo, Théresse
Poutche, Djustin et pus l’buresse.
Sur les côtés, chin qui-a d’pus beau
In vot l’lion et pus l’taureau.
Je n’sais po si j’m’abuse ; à m’mote
Qui s’font des grimace’ à l’inn’ l’aute,
Bref, in asseur’ que cheull’ majon
Ill’tra bâti d’inn’ tell’ fachon
Que ch’étra inn’ petit’ mervelle,

Et qu’in n’in verra po d’parelle.

Qu’mint que j’vas fair’, dit’ mo inn’ fos,
Pour ermercier les Tourchégnos,
Et mes amiss’ Roubaignos ?
Qu’mint leu prouver m’n’erconnaissance
Pou tou leu générosité ?
V’la tous les membres du Comité,
Ch’est grâce à leu  persévérance
Qu’in réussit avec bonheur,
Je l’z’ermercie du fond du tchœur !
D’téfos l’Broutteux n’a qu’in mérite
Ch’est d’avoir tchanté sin pays,
D’avoir aimé sin Paradis ;
C’l’indrot d’la terre,
Du’ qu’in s’rappell’ des jours
Qu’vin les bras de s’mère
In dormot sus s’n’écours.
Ch’est  de s’majon d’naissance
Tout plein d’souv’nir d’enfance
D’tous nos joies, nos amours,
Ch’est l’indrot de s’patrie
Que jamais in n’oblie,
C’beau paradis :
Ch’est sin pays !
Tchan que j’ven’rai à disparaîte
J’demanr’ que sus m’ajon in mette
Chés simbles mots
D’in Tourchégnos :
" Vers le Maître de la Nature,
" Quand s’en ira le Tourquennois
" Que son cœur doucement murmure
" Ces mots pour la dernière fois :
" Vive Tourcoin !
" Vive ce petit coin !

Jules Watteeuw