LA BIÉRE DU NORD

 

1

 

On a tout d'puis que l'monde est monde,

Aussi bien à Lill' qu'à Paris,

Canté tour à tour à la ronde

L' boisson préféré' d' sin pays.

Su l' vin, su l' cidre, comm' su l' bière,

Chacun a dit sin goût ; d'abord,

Mi, din tout cha chin que j' préfère,

Ch'est l' bièr' du Nord,

Ch'est l' bièr' du Nord.

Mi, din tout cha chin que j' préfère,

Ch'est l' bièr' du Nord,

Ch'est l' bièr' du Nord.

 

2

 

On a biau nous dir' que l' champane,

Rind aux pus moroses l' gaité.

Cha n' rirnplach'ra point nou tisane

Ch' bon jus d'houblon, partout vanté.

On a déjà l'humeur légère

Rien qu'in ad'mirant s' couleur d'or,

On noy' sin chagrin et s' misère

Dins l' bièr' du Nord,

Dins l' bièr' du Nord.

On noy' sin chagrin et s' misère

Dins l' bièr' du Nord,

Dins l' bièr' du Nord.

 

3

 

On peut vir tout au tour d'eun' table,

Quand vient l' soir, dins chaq' cabaret,

Des francs buveurs l' mine agréable, Fair' tranquill'mint leu chint d'piquet.

L' cabar'tière avé s' n'air honnette,

Vient verser chacun à plein bord,

Gracieus'mint avec eun' canette,

De l' bièr' du Nord,

De l' bièr' du Nord .

Vient verser chacun à plein bord,

Gracieus'mint avec eun' canette,

De l' bièr' du Nord,

De l' bièr' du Nord .

 

4

 

Après, comm' des joyeux trouvères,

Nous aimons canter des canchons,

Quand nous trinquons, l' doux bruit d' nos verres,

Forme l' pus biau des carillons.

On peut nous intint' chaqu' dimanche,

Toudis l' même intrain, l' même accord.,

Chin qui nous rind cheul ga¨té franche

Ch'est l' bièr' du Nord,

Ch'est l' bièr' du Nord.

Chin qui nous rind cheul ga¨té franche

Ch'est l' bièr' du Nord,

Ch'est l' bièr' du Nord.

 

5

 

L'ouverier du Nord préfèr' boire

Sin jus d'houblon, au jus d' rogin,

Ch'est parc' qui n'aim' point, j'aime à l' croire,

Qu'on viench' mette d' liau dins sin vin.

L' sam'di quand i r'chot l' du' d' ses peines,

Si bot quèq' pinte i n'a point tord,

Ch'qui li r'met du sang dans les veines,

Ch'est l' bièr' du Nord,

Ch'est l' bièr' du Nord.

Ch'qui li r'met du sang dans les veines,

Ch'est l' bièr' du Nord,

Ch'est l' bièr' du Nord.

 

6

 

Quand un garchon quitte s'famille

Pour aller r'jointe au régiment,

Qui sot d'Cambrai, d' Dunkerque ou d'Lille,

I parte avec sin cœur contint.

Servir sin pays ch'est eun' fiète ;

Mais quand il est bien lon d'sin port,

I n'a fauque eun' séquoi qui r'grette,

Ch'est l' bièr' du Nord,

Ch'est l' bièr' du Nord.

I n'a fauque eun' séquoi qui r'grette,

Ch'est l' bièr' du Nord,

Ch'est l' bièr' du Nord.

 

 

Henri Fournier

__________________________

CHANSON EN PATOIS DE LILLE