LA BIERE DU NORD

 

Air nouveau de l'Auteur

 

I

 

On a tout d'puis que l' monde est monde,

Aussi bien à Lill' qu'à Paris,

Canté tour à tour à la ronde

L' boisson préféré' d' sin pays.

Su l' vin, su l' cidre, comm' su l' bière,

Chacun a dit sin goût ; d'abord,

Mi, din tout cha chin que j' préfère

Ch'est l' bière du Nord,

Ch'est l' bière du Nord.

Mi, din tout cha chin que j' préfère

Ch'est l' bière du Nord,

Ch'est l' bière du Nord.

 

II

 

On a biau nous dir' que l' champane,

Rind aux pus moroses l' gaité.

Cha n' rirnplach'ra point nou tisane

Ch' bon jus d'houblon, partout vanté.

On a déjà l'humeur légère

Rien qu'in ad'mirant s' couleur d'or,

On noy' sin chagrin et s'misère

Dins l' bière du Nord,

Dins l' bière du Nord.

On noy' sin chagrin et s'misère

Dins l' bière du Nord,

Dins l' bière du Nord.

 

III

 

On peut vir tout au tour d'eun' table,

Quand vient l' soir, dins chaq' cabaret,

Des francs buveurs l' mine agréable,

Fair' tranquill'mint leu chint d'piquet.

L' cabar'tière avé s' n'air honnette,

Vient verser chacun à plein bord,

Gracieus'mint avec eun' canette

De l' bière du Nord,

De l' bière du Nord.

Gracieus'mint avec eun' canette

De l' bière du Nord,

De l' bière du Nord.

 

IV

 

Après, comm' des joyeux trouvères,

Nous aimons canter des canchons,

Quand nous trinquons, l' doux bruit d' nos verres,

Forme l' pus biau des carillons.

On peut nous intint' chaqu' dimanche,

Toudis l' même intrain, l' même accord.

Chin qui nous rind cheul gaité franche

Ch'est l' bière du Nord,

Ch'est l' bière du Nord.

Chin qui nous rind cheul gaité franche

Ch'est l' bière du Nord,

Ch'est l' bière du Nord.

 

V

 

L'ouverier du Nord préfèr' boire

Sin jus d'houblon, au jus d' rogin,

Ch'est parc' qui n'aim' point, j'aime à l' croire,

Qu'on viench' mette d' liau dins sin vin.

L' sam'di quand i r'chot l' du' d' ses peines,

Si bot quèq' pinte i n'a point tord,

Ch' qui li r'met du sang dans ses veines,

Ch'est l' bière du Nord,

Ch'est l' bière du Nord.

Ch' qui li r'met du sang dans ses veines,

Ch'est l' bière du Nord,

Ch'est l' bière du Nord.

 

VI

 

Quand un garchon quitte s'famille

Pour aller r'jointe au régiment,

Qui sot d'Cambrai, d' Dunkerque ou d' Lille,

I parte avec sin cœur contint.

Servir sin pays ch'est eun'fiète ;

Mais quand il est bien lon d'sin port,

I n'a fauque eun' séquoi qui r'grette,

Ch'est l' bière du Nord,

Ch'est l' bière du Nord.

I n'a fauque eun' séquoi qui r'grette,

Ch'est l' bière du Nord,

Ch'est l' bière du Nord.

 

CHANSON EN PATOIS DE LILLE D'HENRI FOURNIER.

parue dans une revue de 1895